Boek resensie deur Johan Rothmann – 14 September 2018
Die
boek bevat praktiese, waarneembare inligting wat maklik lees en
verklarings gee oor gedrag en eienskappe van ‘n wye verskeidenheid
plant en dier spesies wat algemeen in die streek voorkom. Dit word
aangevul met treffende kleurfoto’s wat die verklarings duidelik
illustreer.
Die
inhoud is verdeel in 5 afdelings: soogdiere, voëls, reptiele en
paddas, insekte, spinagtiges en ander ongewerweldes, en bome en
plante. Elk van die 5 afdelings is gedruk op glanspapier met
verskillende agtergrond kleure. Saam met die meer as 900 kleurfoto’s,
maak dit die boek visueel aantreklik en help dit om die verskillende
afdelings vinnig en maklik te bereik.
Die
teiken leser is enige natuur liefhebber wat Suider-Afrika besoek, of
daarin woon. Die kleurvolle aanbieding sal byval vind by kinders en
volwassenes. Die interessante feite in maklik verstaanbare taal sal
beginners en gesoute natuurkenners boei.
Sommige soogdiere geniet meer inligting en blootstelling, byvoorbeeld 6 bladsye word aan Olifante afgestaan, terwyl die Blouaap 2 bladsye kry, en my gunsteling Swartwitpens net 1 bladsy. Vir elke soogdier word natuurlike verspreiding, lengte, gewig, dratyd, lewensduur, dieet, en spoor afdruk in ‘n klein tabel aangedui.
Die afdeling oor voëls is nie ‘n identifiseringsgids nie, maar eerder ‘n bron van boeiende feite oor die biologie en gedrag van die mees algemeenste voëls in ons streek. Interessante inligting wat op meer as een spesie van toepassing is, word verduidelik, byvoorbeeld: wat en hoe word die verskillende kleure van vere veroorsaak, of hoe maak voëls geluide. Soortgelyke voëls word verder in groepe beskryf, soos die hoofstuk oor Visvangers, of Roofvoëls.
‘n Groot verskeidenheid van inheemse bome word volledig beskryf met eenvoudige simbole wat die blaartipe, blaarrand, blaarrangskikking, en blaar duur aandui. ‘n Interessante toevoeging naas die bome, is die afdeling oor blomplante met tipiese volksname soos Noem-noem, Vingerhoedblom, Skoonma-se-tong, Bobbejaanstert.
Dertig insek spesies, negentien spinnekop spesies, vier skerpioene, en ses ander algemene ongewerweldes word beskryf.
Voorbeelde van interessante inligting wat nie in gewone veldgidse voorkom nie, is:
-
Die hare van ‘n Klipsringer is hol. Dit dien as isolasie teen uiterste temperature, help om vog te bewaar, en dien as skokbrekers indien die bokkie teen rotste sou val.
-
Visvangers is baie ingestel op persoonlike higiëne. Alhoewel die neste smerig en vol mis voorkom, duik volwasse Visavangers eers in water nadat hulle die nes verlaat om skoon te word.
-
Beskrywing van hoe die Valdeurspinnekop sy valdeur maak om prooi te vang.
Vir
al die spesies wat in die boek voorkom, word die Afrikaanse en
wetenskaplike name gegee. Daar is ‘n Engelse weergawe van die boek
(Nature Unpacked), maar dit is jammer dat die Engelse name nie
ook in hierdie Afrikaanse weergawe gegee word nie. Die volledige
indeks agter in die boek maak dit moontlik om vir spesies te soek
volgens die Afrikaanse of wetenskaplike naam.
Die
boek is een van die Briza Klankleser publikasies.
Die opsionele ekstra Klankleser
apparaat maak dit moontlik om na diere en voëlgeluide te luister
deur net die apparaat op die spesifieke bladsy te hou. Die resensie
weergawe het nie die Klankleser apparaat ingesluit nie, so ek kan
ongelukkig nie daaroor my waarneming gee nie.
Megan Emmett, die skrywer van Jou Natuurgids, is ‘n bekende
in die natuurlewe bedryf. As gekwalifiseerde veldgids met FGASA vlak
3 kwalifikasie, het sy praktiese ondervinding oor ‘n lang tyd in
die Kruger Nasionale Park opgedoen en later betrokke geraak by die
opleiding van veldgidse. Haar belangstelling in die akademiese sy van
die natuurlewe het gelei tot verskeie artikels in tydskrifte soos
African Geographic, en natuur reekse vir televisie kanale 50/50,
National Geographic en Animal Planet. ‘n Paar boeke het al uit haar
pen verskyn, waarvan die bekendste en suksesvolste die Game Ranger
in Your Backpack, oftewel Die
Veldwagter Stap Saam in
Afrikaans. Die vraag
duik op hoe verskil Jou Natuurgids
van hierdie vorige boeke – bied dit iets nuut en anders ?
Die formaat met die kleurvolle afdelings, kleur foto’s, en praktiese, verstaanbare verduidelikings stem baie ooreen. Alhoewel sekere spesies in beide boeke beskryf word, kan ek sê dat Jou Natuurgids meer spesie beskrywings bevat as Die Veldwagter Stap Saam. Een voorbeeld is die 2-bladsy beskrywing van die Gewone Luislang wat gladnie in Die Veldwagter Stap Saam verskyn het nie. Hier word 48 boomsoorte teenoor 43 beskryf plus die beskrywing van 47 blomplante teenoor die ander boek se 32. Dieselfde geld vir die ander afdelings. Jou Natuurgids bevat dus meer inligting saamgevat in een boek.
Die formaat met die kleurvolle afdelings, kleur foto’s, en praktiese, verstaanbare verduidelikings stem baie ooreen. Alhoewel sekere spesies in beide boeke beskryf word, kan ek sê dat Jou Natuurgids meer spesie beskrywings bevat as Die Veldwagter Stap Saam. Een voorbeeld is die 2-bladsy beskrywing van die Gewone Luislang wat gladnie in Die Veldwagter Stap Saam verskyn het nie. Hier word 48 boomsoorte teenoor 43 beskryf plus die beskrywing van 47 blomplante teenoor die ander boek se 32. Dieselfde geld vir die ander afdelings. Jou Natuurgids bevat dus meer inligting saamgevat in een boek.
Shem Compion is ‘n professionele wildfotograaf met verskeie nasionale en internasionale toekennings. Hierdie boek is sy vyfde publikasie waarvan sommiges ook saam met Megan Emmett was. Alhoewel meeste foto’s in die boek deur hom geneem is, word foto’s van 38 ander fotograwe ook ingesluit.
Jou
Natuurgids is nie bedoel as ‘n
identifiseringsgids nie. Dit bevat veel meer inligting wat natuur
reisigers in Suider-Afrika ‘n nuwe bron van interessante feite
bied. Dit sal ook van groot waarde wees vir skoliere/studente wat
soek na vars boeiende materiaal oor ons natuurlewe, saamgevat in een
boek.
Jou
Natuurgids deur
Megan Emmett en meeste foto’s deur Shem Compion
Eerste uitgawe, eerste druk 2018
Sagteband
omslag met 384 bladsye van 240 x 168mm.
Uitgegee deur BRIZA PUBLIKASIES (www.briza.co.za)
Uitgegee deur BRIZA PUBLIKASIES (www.briza.co.za)
ISBN:
978-1-920217-41-9
Prys
tydens die resensie (Sep 2018): R326.09 BTW ingesluit.